Ndërmarrja publike Trafiku Urban në Prishtinë ka njoftuar qytetarët për devijimin e përkohshëm të linjave të autobusëve nr. 3 dhe nr. 4. Ky vendim, i marrë në përputhje me vendimin e Komunës së Prishtinës, vjen si pasojë e mbylljes për qarkullim të segmentit rrugor nga Rrethi i Flamurit deri te Rrethi i Spitalit për shkak të punimeve në rrugën "Fehmi Lladrovci".
Ndryshimet e itinerarit janë në fuqi nga data 10 korrik dhe do të zgjasin deri më 18 korrik 2026. Devijimi vlen ekskluzivisht për drejtimin e ardhjes, ndërsa në drejtimet e kundërta qarkullimi do të zhvillohet sipas itinerarit të rregullt.
Itineraret e reja të përkohshme për drejtimin e ardhjes janë:
• Linja nr. 3 (Bardhosh – Rrethi i Matit): Eqrem Çabej – Afrim Zhitia – Xhevë Lladrovci – Astrit dhe Arbnor Dehari – Rrethi i Matit.
• Linja nr. 4 (Parku i Gërmisë – Matiqan): Eqrem Çabej – Afrim Zhitia – Xheladin Rekaliu – Matiqan.
Sipas njoftimit, në drejtimet Matiqan – Parku i Gërmisë (për linjën 4) dhe Rrethi i Matit – Bardhosh (për linjën 3), autobusët do të vazhdojnë të qarkullojnë në rrugët e zakonshme pa asnjë ndryshim.