Diskutime jo publike mes zyrtarëve evropianë po zhvillohen për mundësinë e anëtarësimit në Bashkimin Evropian (BE) pa të drejtën e vetos për gjashtë shtetet e Ballkanit Perëndimor. Kjo ide po shfaqet në lidhje me negociatat për paqen në Ukrainë, ku iniciativën kryesore e mbajnë Shtetet e Bashkuara.
E drejta e vetos, e parashikuar në traktatet themeluese të BE-së, lejon çdo shtet anëtar të bllokojë vendime që kërkojnë unanimitet, si pranimi i anëtarëve të rinj. Të paktën dy udhëheqës të Ballkanit Perëndimor kanë shprehur publikisht gatishmërinë për të pranuar një anëtarësim të tillë.
Edhe pse BE-ja nuk është formalisht e përfshirë në negociatat për Ukrainën, po shqyrtohet anëtarësimi i saj si pjesë e një pakete paqeje me Rusinë. Zyrtarë amerikanë e kanë konfirmuar këtë disa herë në mënyrë joformale për gazetarët.
Grupi i zgjerimit përfshin 10 shtete: gjashtë të Ballkanit Perëndimor, si dhe Ukraina, Moldavia dhe Gjeorgjia. Negociatat për Turqinë janë të ngrira prej më shumë se dhjetë vitesh.
Qëndrimi i Komisionit Evropian
Kur u pyet për një lehtësim të mundshëm të kritereve për anëtarësimin e vendeve të Ballkanit, shërbimi për media i Komisionit Evropian i tha Radios Evropa e Lirë se zgjerimi i BE-së tani nuk shihet vetëm nga këndvështrimi i përfitimeve ekonomike, por edhe në një kontekst sigurie. "Zgjerimi sjell përfitime të qarta si për shtetet anëtare, ashtu edhe për vendet që synojnë anëtarësimin. Debati aktual tregon qartë një gjë: zgjerimi ka lidhje edhe me sigurinë. Në kontekstin aktual gjeopolitik."