Policia e Shtetit ka finalizuar me sukses operacionin policor të koduar “Dobrenjë”, pas një hetimi njëmujor me metoda proaktive të kryer nga Komisariati i Policisë në Skrapar, në koordinim me Prokurorinë. Operacioni kishte për qëllim dokumentimin e veprimtarisë kriminale të dy shtetasve të dyshuar për kultivimin e bimëve narkotike në zonën pyjore të fshatit Dobrenjë.
Gjatë kontrollit në terren, forcat e rendit gjetën të kultivuara 31 bimë të dyshuara të llojit Cannabis Sativa, të cilat u asgjësuan në vend. Gjatë ndërhyrjes, u bë kapja në flagrancë dhe arrestimi i shtetasit T. H., 22 vjeç, banues në fshatin Rromas.
Ndërkohë, bashkëpunëtori i tij, shtetasi Q. M., 22 vjeç, banues në fshatin Dobrenjë, i cili dyshohet se ruante parcelën, arriti të largohet. Sipas njoftimit zyrtar, sapo ka konstatuar praninë e shërbimeve policore, 22-vjeçari ka hedhur në tokë një armë zjarri të llojit kallashnikov dhe është larguar me vrap në drejtim të zonës së pyllëzuar. Policia ka sekuestruar armën e zjarrit, ndërsa vijon puna intensive për lokalizimin dhe kapjen e personit në kërkim. Materialet procedurale i kanë kaluar Prokurorisë për veprime të mëtejshme ligjore.