Në kuadër të bashkëpunimit dypalësh ndërmjet Republikës së Kosovës dhe Republikës Federale të Gjermanisë, është finalizuar marrëveshja për projektin donator Enable & Enhance Initiative. Ky projekt ka për qëllim fuqizimin dhe avancimin e kapaciteteve operacionale të Forcës së Sigurisë së Kosovës (FSK), duke shërbyer si një vazhdimësi e projekteve të mëparshme në fushën e sigurisë dhe mbrojtjes.
Ceremonia e nënshkrimit u zhvillua me pjesëmarrjen e zyrtarëve të lartë. Përveç sekretarit të përgjithshëm Gafurr Dugolli dhe atasheut gjerman të mbrojtjes, nënkolonel Guido Altendorf, të pranishëm ishin edhe:
• Kolonel Imer Avdiu, drejtor i Departamentit për Logjistikë dhe Infrastrukturë në Ministrinë e Mbrojtjes.
• Silke Bellmann, e ngarkuar me punë në Ambasadën e Gjermanisë në Kosovë.
• Nënkoloneli Fabian Vogl dhe majori Claus Schumm nga Ekipi Këshillues dhe Ndërlidhës i NATO-s (NALT).
Gjatë këtij takimi, Gafurr Dugolli shprehu mirënjohjen për mbështetjen e vazhdueshme të shtetit gjerman ndaj Kosovës. Ai nënvizoi rëndësinë e partneritetit strategjik në fushën e sigurisë dhe shprehu bindjen se bashkëpunimi i ndërsjellë do të vijojë me projekte të tjera në të ardhmen.