Gjykata e Durrësit caktoi masën e sigurisë "arrest në burg" për Rezart Abazaj, 44 vjeç, i cili mbrëmjen e 16 majit përplasi automjetin e policisë në zonën e ish-Kënetës.
Patrulla ishte njoftuar nga banorët e lagjes 17 për një automjet që lëvizte me shpejtësi të lartë dhe në mënyrë të pakontrolluar. Gjatë ndjekjes, Abazaj lëvizi makinën mbrapsht dhe goditi mjetin e efektivëve. Testi i alkoolit tregoi përqindje 1.4 mg/l.
Sipas Policisë së Durrësit, 44-vjeçari është përsëritës i së njëjtës vepër penale. Avokati mbrojtës Vladimir Skënderi tha se klienti i tij e ka kryer veprën edhe dy muaj më parë dhe se gjatë seancës ai pranoi fajin dhe shprehu pendesë.
Gjykata mbajti parasysh përsëritjen e veprës dhe rrezikun e shkaktuar për efektivët e policisë. Çdo person prezumohet i pafajshëm deri në vendim gjyqësor të formës së prerë.