Një 44-vjeçar me emrin Rezart Abazaj u arrestua në flagrancë nga policia në Durrës. Ngjarja ndodhi në rrugët e lagjes 17, në zonën e ish-Kënetës.
Patrulla ishte njoftuar për një drejtues mjeti që lëvizte me shpejtësi të lartë dhe në mënyrë të pakontrolluar. Automjeti nuk kishte targa. Gjatë ndjekjes, Abazaj nuk iu bind urdhrit për të ndaluar dhe u përpoq të largohej.
Ai bëri manovra mbrapsht dhe goditi automjetin e policisë. Pas arrestimit, testi i alkoolit tregoi 1.4 mg/l, dyfishin e sasisë së Nikoll Radaçit.
Abazaj rezulton përsëritës për veprën penale të drejtimit të mjetit në gjendje të dehur. Më 5 mars ai ishte arrestuar për një incident të ngjashëm në rrugën Vëllazërimi, por gjykata kishte caktuar masën e sigurisë detyrim paraqitjeje.
Përditësime
Policia e Shtetit pritet të ngrejë akuza ndaj Rezart Abazaj për drejtim mjeti në gjendje të dehur, mosbindje ndaj urdhrit të policisë dhe kundërshtim të forcave të rendit, në një ngjarje që ndodhi një rrugicë larg vendit ku humbën jetën dy fëmijë të Nikoll Radaçit.
Report TV ka siguruar pamje video ku Rezart Abazaj përpiqet të lëvizë mbrapsht dhe godet automjetin e policisë.