Gjykata e Tiranës ka vendosur pezullimin e ekzekutimit të dënimit me burg për Dorina Sejdinin, duke urdhëruar lirimin e saj të menjëhershëm nga burgu i grave në Pojskë. 34-vjeçarja ishte dënuar me 2 muaj burgim për veprën penale të dhunës në familje.
Pas arrestimit të saj në pikën kufitare të Muriqanit, gjatë kthimit nga Gjermania, Sejdini u dërgua në burg. Për shkak të moshës së fëmijës, foshnja 7-muajshe iu bashkua nënës në ambientet e posaçme të institucionit, ndërsa dy fëmijët e tjerë, të moshës 2 dhe 4 vjeç, mbetën në kujdesin e të afërmve. Vendimi për lirimin e saj u mor nga gjyqtari Edvan Velçani, i cili shqyrtoi kërkesën e paraqitur nga mbrojtja për rivendosje në afat dhe pezullim të dënimit.
Ky rast shkaktoi një debat të gjerë institucional. Avokati i Popullit vizitoi institucionin për të verifikuar kushtet dhe ligjshmërinë e procedurave, duke theksuar se moslirimi i saj do të përbënte shkelje. Njëkohësisht, Presidenca e Republikës njoftoi se po e ndiqte çështjen me vëmendje, duke shprehur gatishmërinë për të shqyrtuar një falje presidenciale, nëse rezulton se 34-vjeçarja nuk është përfituese e amnistisë penale të vitit 2026.
Me këtë vendim, Sejdini nuk konsiderohet më nën efektin e një vendimi të formës së prerë dhe çështja do të vijojë shqyrtimin në Gjykatën e Apelit të Tiranës.