Gjykata e Shkallës së Parë e Juridiksionit të Përgjithshëm Durrës ka vendosur masën e sigurisë arrest në burg për 26-vjeçarin Arbër Xhaxhaj, i cili shkaktoi aksidentin tragjik natën e 15 janarit 2026 te ura e Dajlanit në Durrës, ku humbi jetën 18-vjeçarja Vikena Greku.
Aksidenti ndodhi kur Xhaxhaj, i cili rezultoi i dehur pas testit të alkoolit, humbi kontrollin mbi automjetin që drejtonte. Mjeti u përplas me barrierat anësore të urës, ra prej saj dhe përfundoi brenda një biznesi. Nga ngjarja mbetën të plagosur vetë shoferi si dhe dy këmbësorë.
Arbër Xhaxhaj u arrestua menjëherë nga policia natën e aksidentit. Ai akuzohet për veprat penale "Drejtimi i mjetit në mënyrë të parregullt" (neni 291 i Kodit Penal) dhe "Shkelja e rregullave të qarkullimit rrugor" (neni 290/3 i Kodit Penal).
Vendimi gjyqësor
Seanca u zhvillua më 17 janar 2026, në orën 10:00, nën kryesinë e gjyqtarit Orgent Nazaj. Prokuroria, e përfaqësuar nga prokuroreja Matilda Fetau, kërkoi masën e arrestit. Gjykata, me Vendimin Nr. 26 të datës 17.01.2026, ka caktuar të vlefshme masën e arrestit në burg për çështjen penale me Nr. 26 Akti.