Gjykata e Lartë Rajonale e Dyseldorfit shpalli të martën, më 22 shtator, vendimin për një 18-vjeçar nga Kosova, duke e dënuar me 9 vjet burgim. I riu u shpall fajtor për dy raste të tentativës për vrasje dhe lëndim të rrezikshëm trupor. Në vendimin e gjykatës është marrë parasysh një dënim i mëparshëm për të mitur nga Gjykata e Qarkut në Essen, ndërsa vendimi mbetet ende jo i formës së prerë.
Sipas hetimeve, i riu ishte radikalizuar përmes internetit dhe kishte zhvilluar qëndrime islamiste. Ngjarja ka ndodhur në shtator të vitit të kaluar, kur autori ishte ende 17 vjeç. Sipas gjykatës, ai kishte planifikuar të vriste mësuesen e tij në një shkollë profesionale dhe të sulmonte persona të besimit hebre në Sinagogën e Vjetër në Essen. I akuzuari ka pranuar veprat, duke deklaruar se sulmi ndaj mësueses ishte nxitur nga pretendimi i tij se ajo kishte fyer Profetin Muhamed.
Ditën e sulmit, autori fillimisht kishte plagosur kujdestarin e një shkolle fillore, ku kryente shërbim në komunitet. Më pas, ai sulmoi mësuesen e tij, duke i shkaktuar plagë të rënda në kraharor. Pasi gjeti Sinagogën e Vjetër të mbyllur, ai sulmoi me thikë një person të pastrehë në një stacion autobusi. Sulmi mori fund kur policia e ndaloi të riun në një park, ku një efektiv e qëlloi me armë zjarri pasi autori kishte nxjerrë thikën, duke e plagosur rëndë.
Trupi gjykues ka urdhëruar që i riu të dërgohet në një institucion për terapi sociale. Për shkak të vlerësimit të rrezikshmërisë së lartë për përsëritje të veprave penale, gjykata theksoi se nuk përjashtohet mundësia e ndalimit preventiv edhe pas vuajtjes së dënimit.