Autoritetet italiane kanë goditur një strukturë financiare të paligjshme, e cila funksiononte si një "bankë fantazmë" në qytetin e Pratos, në rajonin e Toskanës. Sipas hetimeve të Drejtorisë Antimafia të Firences, skema mundësonte pagesa të padukshme dhe pastrimin e parave përmes sistemit "hawala", i njohur si "paratë fluturuese".
Në qendër të këtij hetimi ndodhet një shtetas kinez 50-vjeçar, i dënuar më parë për trafik droge. Ai dyshohet se kishte ngritur një rrjet për riciklimin e fitimeve nga trafiku i drogës dhe transaksionet midis bizneseve tekstile. Paratë mblidheshin nga një rrjet korrierësh dhe shpërndaheshin në biznese që operonin në vende si Spanja, Franca dhe Gjermania, duke shmangur gjurmët bankare.
Sipas prokurorëve, klientët e kësaj "banke fantazmë" përfshinin organizata të njohura kriminale, ndër të cilat:
• 'Ndrangheta
• Camorra
• Sacra Corona Unita
• Një grup kriminal shqiptar
Hetuesit kanë dokumentuar prova lidhur me pazaret e drogës, përfshirë një rast të vitit 2022, ku një marrëveshje është finalizuar brenda një automjeti luksoz Rolls-Royce. Lënda narkotike transportohej më pas drejt Pratos me mjete të pajisura me vende të fshehta. Në përfundim të operacionit, përveç 41 të arrestuarve (shtetas italianë, kinezë dhe shqiptarë), autoritetet sekuestruan asete me vlerë 60 milionë euro.