Kryetari i Partisë Demokratike të Kosovës (PDK), Bedri Hamza, priti sot në takim raportuesin për Kosovën në Parlamentin Evropian, eurodeputetin Riho Terras. Në qendër të bisedimeve ishin zhvillimet politike në vend, procesi i integrimit evropian dhe domosdoshmëria e tejkalimit të ngërçit institucional.
Hamza falënderoi Terras për angazhimin e vazhdueshëm dhe për raportin e fundit të Parlamentit Evropian, duke e vlerësuar si një mesazh mbështetës për aspiratat e Kosovës për anëtarësim në Bashkimin Evropian. Sipas tyre, raporti shërben edhe si një thirrje për të shmangur vonesat e mëtejshme në funksionalizimin e institucioneve, të cilat janë shkaktuar nga krizat e brendshme politike.
Kryetari i PDK-së theksoi se partia që ai drejton ndan shqetësimin e shprehur në raport mbi pamundësinë e krijimit të institucioneve plotësisht funksionale për një periudhë të gjatë. Ai nënvizoi se Kosovës i duhen institucione që marrin vendime efektive, zbatojnë reforma dhe rindërtojnë besimin me partnerët ndërkombëtarë.
“Stabiliteti nuk duhet të nënkuptojë vetëm formimin e institucioneve, por edhe qeverisjen demokratike, dialogun politik dhe respektimin e Kushtetutës”, deklaroi Hamza.
Gjatë së njëjtës ditë, eurodeputeti Riho Terras zhvilloi takime edhe me ushtruesen e detyrës së presidentit, Albulena Haxhiun.