Ushtruesja e detyrës së presidentes së Kosovës, Albulena Haxhiu, ka emëruar Vasfije Krasniqi Goodman dhe Shyhrete Tahiri si të deleguara të posaçme për çështjen e të mbijetuarave të dhunës seksuale gjatë luftës në Kosovë.
Gjatë takimit të zhvilluar më 10 prill 2026, u vlerësua guximi dhe qëndrueshmëria e tyre, si dhe roli i rëndësishëm që kanë luajtur në thyerjen e heshtjes dhe në kërkimin e drejtësisë për viktimat.
Sipas komunikatës së Zyrës së Presidencës, zëri i tyre ka ndihmuar që kjo çështje të trajtohet me dinjitet dhe seriozitet, si në vend ashtu edhe në arenën ndërkombëtare. Angazhimi i tyre tani ka marrë dimension institucional.
Në takim u diskutua vazhdimi i bashkëpunimit me institucionet dhe avancimi i të drejtave të të mbijetuarave.
“Institucionet do të vazhdojnë angazhimin për dinjitet, drejtësi dhe trajtim të barabartë”, përfundon komunikata.