Policia e Këlcyrës ka finalizuar operacionin e koduar “Fugitive”, duke arrestuar një shtetas të shpallur në kërkim ndërkombëtar.
Në pranga ka rënë Fatbardh Çela alias Gentian Çela, 51 vjeç, banues në Këlcyrë, qarku i Gjirokastrës. Ai ishte shpallur në kërkim nga Interpol Roma, pasi Gjykata e Veronës e kishte dënuar me 10 vite burgim për trafikimin e lëndëve narkotike. Arrestimi u bë me qëllim ekstradimin drejt Italisë.
Operacioni u zhvillua nga specialistët për Hetimin e Narkotikëve, në bashkëpunim me Stacionin e Policisë Këlcyrë, pas informacioneve operative për vendndodhjen e të kërkuarit. Veprimet e shpejta dhe të koordinuara të policisë siguruan kapjen e tij.
Interpol Tirana, në bashkëpunim me Interpol Romën, po vijon procedurat për ekstradimin e 51-vjeçarit drejt Italisë.