Në kuadër të shënimit të 27-vjetorit të Çlirimit të Kosovës, ish-ushtari amerikan i NATO-s, Eric Nowlen, ka ndarë një mesazh emocionues, duke reflektuar mbi shërbimin e tij gjatë luftës dhe periudhës së pasluftës. Nowlen tregoi se edhe pas 27 vitesh, ai vazhdon të pranojë mesazhe falënderimi nga qytetarët kosovarë, gjë që për të përbën një dëshmi se kontributi i forcave ndërkombëtare ka lënë gjurmë të qëndrueshme.
Reflektimi i tij u nxit nga një kontakt i drejtpërdrejtë me gazetarin nga Kaçaniku, Alban Muhaxheri, i cili i shprehu mirënjohje për rolin e NATO-s në garantimin e paqes dhe lirisë.
"Kanë kaluar 27 vjet që kur kam qenë atje, por ende sot, të paktën një person nga Kosova më shkruan për të më falënderuar për shërbimin tim dhe për paqen e lirinë që gëzojnë. Momente të tilla më bëjnë të ndiej se koha dhe kontributi im kanë pasur vërtet vlerë dhe se sakrifica ime nuk ka qenë e kotë", shkroi Nowlen.