Gjeneralmajor Özkan Ulutaš, komandant i KFOR-it, zhvilloi sot një takim me kryetarin e Komunës së Mitrovicës së Jugut, Faton Peci, në ambientet e komunës.
Gjatë takimit, palët diskutuan situatën e përgjithshme të sigurisë, si dhe çështjet që ndikojnë në funksionimin e komunave dhe qytetarëve. Gjeneralmajor Ulutaš theksoi përkushtimin e vazhdueshëm të KFOR-it për ruajtjen e një mjedisi të sigurt dhe të qetë për të gjithë qytetarët e Kosovës.
KFOR-i rikujtoi se vazhdon të zbatojë mandatin e tij, të bazuar në Rezolutën 1244 të Këshillit të Sigurimit të OKB-së të vitit 1999, për të kontribuar në siguri, stabilitet dhe liri të lëvizjes në mënyrë të paanshme. Misioni punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), secili sipas rolit të vet si reagues sigurie.
Nga ana e tij, Faton Peci theksoi rëndësinë e bashkëpunimit të vazhdueshëm ndërmjet institucioneve lokale dhe KFOR-it për garantimin e sigurisë për të gjithë qytetarët, pa dallim komuniteti. Ai falënderoi KFOR-in për kontributin në lirinë e Kosovës, ruajtjen e paqes dhe stabilitetin në vend e rajon.