Komisioni Europian ka hedhur në tryezë tre opsione për reformën e procesit të zgjerimit të Bashkimit Europian, për të shmangur pritjet e gjata të vendeve kandidate. Këtë e ka pranuar Marta Kos, komisionerja për Zgjerimin, në një intervistë për revistën Politico. Sipas saj, vendimin përfundimtar duhet ta marrin shtetet anëtare të BE-së.
Sipas mediave në Bruksel, opsioni i parë parashikon vazhdimin e metodologjisë aktuale të zgjerimit. Opsioni i dytë synon integrimin gradual të vendeve kandidate para anëtarësimit të plotë, i bazuar në reformat e kryera. Skenari i tretë përfshin pranimin e anëtarësimit dhe përfundimin e reformave pas bashkimit, të shoqëruar me mekanizma sigurie për Unionin.
A2CNN i është drejtuar Komisionit Europian për të sqaruar nëse këto propozime u janë prezantuar formalisht shteteve anëtare dhe nëse është miratuar ndonjëri prej tyre. Gjithashtu, është pyetur për mundësinë e zbatimit të tyre ndaj vendeve të Ballkanit Perëndimor, përfshirë Shqipërinë. Në përgjigje, Komisioni thekson rëndësinë gjeopolitike dhe progresin mbi bazën e meritës.
Në deklaratën zyrtare për A2CNN, Komisioni Europian shprehet: «Politika e zgjerimit të BE-së është më shumë se kurrë një investim gjeostrategjik në prosperitetin, stabilitetin dhe sigurinë afatgjatë të kontinentit tonë. Që nga fillimi i këtij mandati, ne i kemi bërë thirrje të gjithëve, si Unionit ashtu edhe vendeve kandidate, që të shfrytëzojnë këtë moment. Zgjerimi sjell përfitime të qarta si për shtetet anëtare, ashtu edhe për vendet aspirante. Dhe një gjë është e qartë: zgjerimi ka të bëjë edhe me sigurinë. Në kontekstin aktual gjeopolitik, duhet të sigurojmë që qasja jonë të jetë e përshtatshme për qëllimin. Siç e kanë bërë të qartë vazhdimisht Presidentja Von der Leyen dhe Komisionerja Kos, ne kemi një parim bazë: zgjerimi është një proces i bazuar në meritë. Komisioni është i gatshëm të vazhdojë këtë diskutim me shtetet anëtare».
Për të sqaruar më tej ndikimin e mundshëm në Shqipëri, A2CNN i është drejtuar edhe Këshillit të BE-së.