Ministri i Mbrojtjes i Kroacisë, Ivan Anushiq, konfirmoi gjatë Samitit të NATO-s në Ankara synimin e Zagrebit për shtimin e kontingjentit ushtarak në misionin paqeruajtës të KFOR-it. Sipas tij, ky plan është në përputhje me vendimin e Saborit (Kuvendit të Kroacisë), i cili lejon angazhimin e deri në 200 ushtarëve.
Deklarata e Anushiq-it vjen në një kohë kur NATO ka bërë të ditur planet për zvogëlimin e trupave në Kosovë, për shkak të përmirësimit të situatës së sigurisë krahasuar me vitin 2023, kur u shënua rritje e tensionit në veri. Megjithatë, ministri kroat nënvizoi se Kroacia mbetet e angazhuar për stabilitetin e Ballkanit Perëndimor dhe e konsideron praninë e fuqishme të aleancës në rajon si një çështje jetike të sigurisë.
Aktualisht, Kroacia kontribuon me rreth 130 ushtarë në këtë mision. Përveç angazhimit brenda KFOR-it, Kroacia ka nënshkruar memorandume bashkëpunimi në fushën e mbrojtjes me Kosovën dhe Shqipërinë, veprime të cilat kanë shkaktuar reagime kritike nga ana e Serbisë.