Në Dhomat e Specializuara në Hagë, mbrojtja e ish-presidentit Hashim Thaçi ka kundërshtuar pretendimet e Zyrës së Prokurorit të Specializuar (ZPS), duke nënvizuar mungesën e provave për ushtrimin e funksionit të drejtorit të Drejtorisë Politike para periudhës së përmendur në aktakuzë.
Sipas mbrojtjes, ZPS pretendon se Thaçi drejtonte Drejtorinë Politike që nga qershori i vitit 1998, por nuk ka paraqitur asnjë provë për këtë rol para kësaj date. Avokati Luka Mishetiq deklaroi se dëshmitari Nuhi Bytyçi, i konsideruar drejtor i Drejtorisë Politike në vitin 1998, nuk u pyet nga prokuroria për këtë pretendim. Vetë dëshmitari tha se Thaçi nuk ka qenë drejtor deri në nëntor të atij viti, dhe ZPS nuk e kontestoi këtë dëshmi.
Mbrojtja ka mohuar gjithashtu rolin udhëheqës të Thaçit në Lëvizjen Popullore të Kosovës (LPK). Mishetiq vuri në dukje se ZPS nuk paraqiti prova dhe nuk i bëri pyetje dëshmitarit Bislim Zyrapi, duke e cilësuar pretendimin si të pabazuar. Prokuroria pretendon se Thaçi mbikëqyrte shpërndarjen e informacioneve politike në favor të shtabit të përgjithshëm të UÇK-së.
Gjithashtu, mbrojtja thekson mungesën e dëshmive se Thaçi ka hartuar komunikata politike të UÇK-së. ZPS ka cituar vetëm dy prova për këtë pretendim, por nuk ka informacion për mbikëqyrjen e shpërndarjes së këtyre informacioneve.
Përditësime
Avokati Mishetiq argumentoi se ZPS nuk ka prova që Thaçi kishte njohuri për krimet specifike të UÇK-së ose dyshim të arsyeshëm për to.
Pretendimet për mungesë hetimesh nga UÇK-ja nuk lidhen me përgjegjësinë individuale të Thaçi-t.
ZPS nuk tregoi lidhje logjike midis deklaratave publike të Thaçi-t dhe krimeve në aktakuzë, duke sfiduar pretendimin e ndërmarrjes kriminale të përbashkët.
Mishetiq shtoi se ZPS nuk i bëri pyetje Bislim Zyrapit për shkak të frikës nga përgjigjet.