Avokati Luka Mishetiq, përfaqësues i Hashim Thaçit, deklaroi se nuk ka pasur prova që e lidhin klientin e tij me komunikatat apo deklaratat publike të UÇK-së.
Sipas tij, Zyra e Prokurorit të Specializuar (ZPS) citon vetëm dy prova për të mbështetur pretendimin se Thaçi ka pasur rol në përgatitjen e këtyre komunikatave. Prova e parë është një intervistë e Rexhep Selimit për ZPS-në, ku ai pretendon lidhje të Thaçit me komunikatën 59.
Mishetiq theksoi se pretendimet e Selimit nuk mund të merren parasysh, pasi në dosjen e tij përfundimtare Selimi ka pranuar se nuk kishte dijeni se kush i hartonte komunikatat e UÇK-së dhe thjesht kishte hamendësuar. Ai shtoi se pretendimet për komunikatën 59 janë të pakonfirmuara dhe Thaçi nuk pati mundësi të kontestojë dëshminë gjatë kundërpyetjeve.
Rrjedhimisht, Mishetiq kërkoi që trupi gjykues të mos e përdorë këtë provë kundër Thaçit, sipas rregullave procedurale.
Prova e dytë e ZPS-së është një pjesë nga libri i shkruar nga Nuhi Bytyqi.
Në komunikatën 59 të UÇK-së, Gani Geci akuzohej si kolaboracionist dhe i lidhur me vrasjen e Abedin Rexhës. Geci ka bërë thirrje të përsëritura për zbulimin e përgjegjësve për këtë komunikatë.