Mekanizmi Ndërkombëtar për Gjykatat Penale, ish-Tribunali i Hagës, ka refuzuar të enjten kërkesën e Ratko Mlladiqit për lirim të përkohshëm nga burgu për arsye shëndetësore. Ai po vuan dënimin me burgim të përjetshëm të shqiptuar në vitin 2021 për gjenocid dhe krime lufte në Bosnje e Hercegovinë, si ish-komandant i Ushtrisë së Republikës Srpska.
Ekspertët e pavarur mjekësorë kanë konstatuar se Shërbimi Mjekësor i Njësisë së Paraburgimit të Kombeve të Bashkuara dhe spitali i burgut e vëzhgojnë dhe trajtojnë në mënyrë adekuate gjendjen e tij shëndetësore. “Ata nuk kanë hasur në mungesë të kujdesit ose trajtimit të duhur, që do ta arsyetonte lirimin e tij”, thuhet në njoftimin e Mekanizmit.
Mlladiqi është vendosur në një strukturë spitalore burgu të ndërtuar rishtaz, të pajisur për kujdes multidisiplinor ndaj të burgosurve me probleme komplekse mjekësore. Ai gëzon monitorim të vazhdueshëm, transferime të shpejta në spitale civile sipas nevojës, kujdes paliativ të përshtatshëm, ndihmë me aktivitetet e përditshme, përkthyes dhe staf që flasin gjuhën e tij.
Mbrojtja kërkoi lirim për shkak të shëndetit të dëmtuar rëndë dhe nevojës për trajtim spitalor. Ministri serb i Drejtësisë, Nenad Vujiq, e vizitoi më 20 prill dhe i kërkoi Hagës mundësinë për mjekim në liri.
Kjo është hera e dytë që refuzohet një kërkesë e tillë. Në qershor 2025, mbrojtja kishte kërkuar lirim të përkohshëm ose të parakohshëm për diagnozë të dyshuar terminale dhe jetëgjatësi të shkurtër, por Mekanizmi e hodhi poshtë për arsye të kujdesit të plotë mjekësor.