Kualifikimi i Brazilit në çerekfinalet e Kupës së Botës 2026, pas fitores 2:1 ndaj Japonisë, ka shkaktuar reagimin e sulmuesit Neymar ndaj ekonomistit gjerman Joachim Klement. Ky i fundit ishte bërë i njohur për saktësinë e modelit të tij, i cili kishte parashikuar fituesit e turneve të viteve 2014, 2018 dhe 2022.
Para ndeshjes së zhvilluar në Houston, Klement kishte deklaruar se Japonia do ta eliminonte Brazilin, duke u bazuar në një model që ndërthur faktorë sportivë, demografikë dhe financiarë. Në një intervistë për "Fortune India", ekonomisti vlerësoi se skuadra japoneze ishte më e fortë se brezi aktual i brazilianëve, duke përmendur fitoret e mëparshme të Japonisë ndaj Gjermanisë dhe Brazilit.
Megjithatë, fusha e lojës dëshmoi të kundërtën. Skuadra e drejtuar nga Carlo Ancelotti arriti të përmbysë rezultatin dhe të sigurojë kalimin në turin tjetër, me golin e fitores të shënuar nga Martinelli në minutën e 95-të. Pas ndeshjes, Neymar publikoi një mesazh ironik në rrjetet sociale: "Z. Joachim Klement… ju lutem, provoni përsëri në Kupën e Botës së ardhshme".
Nuk ishte ky i vetmi rast. Neymar reagoi sërish gjatë natës pas eliminimit të Holandës nga Maroku, një tjetër parashikim i pasaktë i Klementit, i cili e kishte favorizuar kombëtaren holandeze për triumfin në këtë turne.