Federata e Peshkatarëve Sportiv Rekreativ e Kosovës ka njoftuar pezullimin përkohshëm të peshkimit të llojit të peshkut krap në të gjitha liqenet dhe lumenjtë e Kosovës. Vendimi ka hyrë në fuqi më 15 prill 2026 dhe do të zgjasë deri më 31 maj 2026.
Gjatë periudhës së pezullimit lejohet vetëm peshkimi në formën "Peshko dhe Lësho" (Catch & Release), duke ndaluar mbajtjen e peshkut në rrjeta apo forma të tjera për ruajtje. Federata ka bërë të ditur se të gjitha shoqatat e peshkatarëve sportivë dhe rekreativë, anëtare të saj, janë të obliguara ta zbatojnë këtë vendim.
Për zbatimin e masës janë njoftuar rojet federative, të cilat do të monitorojnë terrenin gjatë gjithë periudhës. Mosrespektimi i rregullave mund të sjellë masa ndëshkuese, disiplinore dhe administrative, në përputhje me legjislacionin dhe rregulloret në fuqi.
Ky vendim synon mbrojtjen dhe rigjenerimin e popullatës së krapit gjatë sezonit të shumimit. Federata lutet që peshkatarët të respektojnë me përpikëri dispozitat ligjore përkatëse.