Policia e Shtetit ka finalizuar operacionin ndërkombëtar të koduar “Fury”, për kapjen e personave të shpallur në kërkim ndërkombëtar. Si rezultat i këtij operacioni, në qytetin e Durrësit janë vënë në pranga dy shtetas me rrezikshmëri të lartë shoqërore, të kërkuar nga autoritetet e Maqedonisë së Veriut.
Të arrestuarit janë identifikuar si M. Xh., 26 vjeç, dhe S. N., 34 vjeç. Për këta shtetas, INTERPOL kishte lëshuar urdhra arresti ndërkombëtar për vepra të rënda penale, si vrasje, plagosje, armëmbajtje pa leje dhe pjesëmarrje në organizatë kriminale. Gjatë kontrolleve, dy personave iu gjetën dokumente identifikimi të dyshuara si të falsifikuara, të cilat mendohet se janë përdorur për t'iu shmangur sistemit të drejtësisë.
Në vijim të operacionit, policia arrestoi në flagrancë edhe shtetasin Xh. R., 26 vjeç, nga Maqedonia e Veriut. Ai akuzohet për “Përkrahja e autorit të krimit” dhe “Falsifikimi i dokumenteve”, pasi dyshohet se ka pajisur personat e kërkuar me dokumentet e falsifikuara. Gjatë kontrollit në banesën e tij, policia gjeti dhe sekuestroi një sasi të vogël lënde narkotike Cannabis Sativa.
Operacioni u realizua nga Drejtoria e Forcës së Posaçme Operacionale në Departamentin e Policisë Kriminale, në bashkëpunim me Drejtorinë Vendore të Policisë Durrës, autoritetet e Maqedonisë së Veriut dhe partnerët e Shërbimit Diplomatik të Sigurisë (DSS) të ambasadave të SHBA në Tiranë dhe Shkup. Materialet procedurale i janë referuar Prokurorisë për hetime të mëtejshme.
Përditësime
Policia e Shtetit ka identifikuar dy nga tre të arrestuarit gjatë operacionit 'Fury' në Durrës: Musa Xhavit, 26 vjeç, nga Shkupi, dhe Shenasi Nuredini, 34 vjeç, me lindje në Norvegji. Autoritetet kanë nisur procedurat për ekstradimin e tyre drejt Maqedonisë së Veriut.
Hetimet në kuadër të operacionit 'Fury' në Durrës kanë zbardhur lidhjet e thella kriminale të personave të arrestuar:
- Policia e Shtetit ka identifikuar Shenasi Nuredinin si një prej të ndaluarve.
- Musa Xhaviti, gjithashtu në pranga, akuzohet për vrasjen e një oficeri të Ushtrisë së Republikës së Maqedonisë (ARM). Ai rezulton me precedentë të mëparshëm për armëmbajtje pa leje dhe dyshohet se është i lidhur me grupe kriminale në Shkup, të përfshira në një seri ngjarjesh të rënda kriminale në atë zonë.
Policia e Shtetit ka identifikuar zyrtarisht personin e tretë të arrestuar në operacionin "Fury" si Xhenkiz Rushiti. Identiteti i tij u konfirmua pas verifikimeve në qendrën e kontrollit në Durrës.