Shërbimet e Komisariatit të Policisë Kufitare kanë ndërhyrë në Ksamil, pasi kanë konstatuar një mjet lundrues (skaf) që kishte shkelur perimetrin e sigurisë, duke hyrë në zonën e notimit. Pavarësisht sinjaleve të qarta për ndalim me qëllim verifikimin e dokumentacionit, drejtuesi i mjetit nuk iu bind urdhrit të punonjësve të policisë.
Pas ndalimit, autoritetet vendosën masën administrative prej 500.000 lekësh ndaj pronarit, shtetasit me iniciale A.M., banues në Ksamil. Gjithashtu, mjeti lundrues është bllokuar për një periudhë prej 60 ditësh.
Në vijim të hetimeve, Policia bëri të ditur se biznesi në pronësi të shtetasit të ndëshkuar ka në përdorim edhe 10 mjete të tjera lundruese. Për këtë arsye, efektivët kanë nisur procesin e verifikimit të dokumentacionit për secilin prej këtyre mjeteve. Policia Kufitare theksoi se kontrollet në zonat bregdetare do të vijojnë të jenë të përditshme, me qëllim garantimin e sigurisë për pushuesit gjatë sezonit veror.