Ministri i Financave, Petrit Malaj, deklaroi se në mbledhjen e sotme të qeverisë, më 11 mars 2026, u miratua një akt nënligjor që lidhet me bastet sportive.
Ai theksoi se Ministria e Financave po punon për aktet e tjera nënligjore në këtë fushë. Shpejt do të nxirren të gjitha për të mundësuar edhe bastet online. Kërkohet ende punë dhe është marrë ekspertizë ndërkombëtare për standardet ndërkombëtare.
"Ministria e Financave është duke punuar me aktet nënligjore për bastet. Është edhe një akt që është miratuar sot në mbledhjen e qeverisë dhe shumë shpejt do të dalin të gjitha aktet e nevojshme në mënyrë që të mundësojmë edhe bastet online. Kërkohet punë, është marrë ekspertizë ndërkombëtare në mënyrë që të jetë sipas standardeve ndërkombëtare", u shpreh Malaj.
Bastet online vazhdojnë të kryhen masivisht në Shqipëri në mënyrë të paligjshme, duke shkaktuar pasoja për qytetarët dhe buxhetin. Në dy vitet e fundit, policia ka proceduar afro 1400 persona, ndërsa më shumë se gjysma e tyre kanë përfunduar në arrest me burg që nga shkurti i vitit 2024, kur ligji u miratua në Parlament.
Kjo valë arrestimesh lidhet me mungesën e akteve nënligjore, që nuk janë nxjerrë ende dhe shkelin afatet ligjore të parashikuara nga Parlamenti.