Agjencia e Statistikave të Kosovës (ASK) ka publikuar Indeksin e Çmimeve të Pronave të Banimit (IÇPB) për tremujorin e parë të vitit 2026. Sipas të dhënave, çmimet e banimit kanë shënuar një trend rritës në shkallë vendi.
Krahasuar me tremujorin e katërt të vitit 2025, çmimet e pronave kanë pësuar një rritje prej 2.4 për qind. Ndërsa në raport vjetor, krahasuar me tremujorin e parë të vitit 2025, rritja e përgjithshme është 5.3 për qind.
Të dhënat tregojnë një pabarazi në dinamikën e çmimeve sipas rajoneve:
- Rajoni i Prishtinës: rritje prej 1.4 për qind krahasuar me tremujorin e parë të vitit 2025.
- Rajonet e tjera të vendit: rritje prej 12.3 për qind krahasuar me tremujorin e parë të vitit 2025.
ASK njoftoi se të dhënat për tremujorin e katërt të vitit 2025 janë rishikuar pas përditësimit të bazës së të dhënave administrative, duke saktësuar se vlerat e reja zëvendësojnë ato të publikuara më parë.
Përditësime
Agjencia e Statistikave të Kosovës (ASK) ka zgjeruar serinë kohore të Indeksit të Çmimeve të Banesave, duke përfshirë të dhënat nga tremujori i parë i vitit 2019 deri në tremujorin e parë të vitit 2026. Raporti i përditësuar detajon lëvizjet e çmimeve, duke ofruar pasqyrë mbi ndryshimet tremujore, vjetore dhe mesataret për periudhën 2018-2026.
Sipas ekspertit Shkumbin Misini, rritja e çmimeve të banimit në Kosovë nxitet nga dy faktorë kryesorë: investimet e diasporës, ku 75% e kapitalit dedikohet në sektorin e patundshmërive, dhe rritja e kostove të materialeve të ndërtimit në tregjet globale për shkak të konflikteve ndërkombëtare.