Policia Kufitare e Rinasit ka evidentuar dy raste të mosdeklarimit të parave gjatë kontrolleve në pikën e kalimit kufitar. Në kuadër të kontrolleve të shtuara, të bazuara në analizën e riskut, shërbimet policore kanë sekuestruar shumat dhe kanë proceduar penalisht dy shtetas në gjendje të lirë.
Shtetasi shqiptar D. Sh., 37 vjeç, rezident në Mbretërinë e Bashkuar, u kontrollua në vijën e dytë, ku iu gjetën 15 mijë paundë, të cilat synonte t’i fuste në Shqipëri pa i deklaruar, në kundërshtim me legjislacionin në fuqi.
Në rastin tjetër, shtetasi A. Z., 32 vjeç, banues në Kamëz, iu gjetën 11 370 euro gjatë kontrollit në vijën e dytë. Ai synonte t’i nxirrte nga territori i Shqipërisë pa deklarim, në shkelje të ligjit.
Shumat totale të sekuestruara tejkalojnë 26 mijë euro dhe paundë. Kontrollet dhe verifikimet do të vazhdojnë në mënyrë të pandërprerë për të parandaluar veprimtaritë e paligjshme në kufi.
Materialet procedurale i janë referuar Prokurorisë së Tiranës për veprime të mëtejshme.