Federata e Futbollit e Sllovakisë ka njoftuar se tifozët me pasaporta kosovare nuk do të lejohen të hyjnë në sektorët e tifozëve vendas për ndeshjen ndaj Kosovës, e parashikuar të enjten mbrëma në Bratisllavë.
Sipas njoftimit zyrtar, hyrja në të gjitha sektorët, përveç atij të tifozëve mysafirë, është e rezervuar vetëm për tifozët e ekipit vendas. Personat që mbajnë pankarta, veshin fanella me flamuj të vendeve të tjera, simbole të papranueshme ose mesazhe ofenduese do të ndalohen të hyjnë në stadium. Hyrja në sektorët e vendësve me pasaporta të Kosovës nuk lejohet.
Ky vendim ka ardhur si masë sigurie për të garantuar një ambient të sigurt dhe për të parandaluar sjellje të papërshtatshme, përfshirë thirrje ofenduese. Federata sllovake thekson respektimin e rregullave të stadiumit.
Vendimi ka shkaktuar zhgënjim te tifozët kosovarë, të cilët kishin blerë bileta paraprakisht në sektorë të ndryshëm. Një tifoz anonim, i cituar nga media kosovare, shpjegoi se në momentin e blerjes së biletave nuk ishte specifikuar ndalimi për pasaporta kosovare, por vetëm kufizimet për flamuj e simbole. Ai u bën thirrje tifozëve të tjerë me bileta në sektorët vendas të mos udhëtojnë drejt Sllovakisë.
Përditësime
Bajram Shala, menaxheri i Kombëtares së Kosovës, mohoi zërat për ndalimin e tifozëve kosovarë. Të gjithë tifozët me bileta do të lejohen në çdo sektor pas takimit organizativ.
Kufizimet vlejnë vetëm për shfaqjen e simboleve shtetërore në sektorët e përzier me tifozë sllovakë, sipas vendimit të Federatës Sllovake.