Administrata Tatimore ka njoftuar evidentimin e shkeljeve të legjislacionit tatimor pas kontrolleve të kryera së fundmi në sektorin e ndërtimit dhe tregun e pasurive të paluajtshme. Hetimet administrative kanë zbuluar një rrjet agjencish imobiliare, që operon në disa qytete të vendit, i cili dyshohet se ka fshehur 3,4 milionë euro të ardhura.
Sipas institucionit, këto të ardhura nuk janë pasqyruar në dokumentacionin tatimor sipas detyrimeve ligjore në fuqi. Ky aksion ndërmerret në kuadër të luftës kundër informalitetit, që mbetet përparësi për forcimin e administratës dhe garantimin e një mjedisi të barabartë për operatorët ekonomikë.
Kontrollet do të vijojnë në të gjithë territorin me fokus identifikimin e rasteve të mosdeklarimit të transaksioneve dhe fshehjes së fitimeve. Administrata Tatimore u bën thirrje qytetarëve dhe bizneseve të kontribuojnë në këtë proces, duke raportuar çdo rast të dyshuar shkeljeje përmes aplikacionit zyrtar "Denonco Evazionin".