Alush Kastrati, 80-vjeçar, rezulton i zhdukur që nga 7 marsi 2026. Kërkimet për gjetjen e tij vazhdojnë në zonën e Rahovecit.
Shoqata e Kosovës për Kërkim dhe Shpëtim zhvillon operacionin në bashkëpunim me Forcën e Sigurisë së Kosovës (FSK), Policinë e Kosovës dhe Komunën e Rahovecit. Që nga marrja e njoftimit për zhdukjen, shoqata ka angazhuar departamentin e këmbësorisë dhe ekipin e dronëve.
Ekipet kanë punuar me kapacitet të plotë deri në orët e para të mëngjesit të 9 marsit 2026. Pas një pauze të shkurtër disaorëshe, operacioni rifilloi në mëngjesin e së njëjtës dite dhe vazhdon ende.
Policia e Kosovës ka publikuar një njoftim në Facebook, ku u bën thirrje qytetarëve që të paraqesin çdo informacion për të në numrin 192 ose në stacionin më të afërt.
Përditësime
Departamenti i paraglidingut është angazhuar për kërkime nga ajri në operacionin për Alush Kastratin.
- Operacioni po intensifikohet.
- Familja e të zhdukurit banon në fshatin Zatriq.
- Familjarët kërkojnë çdo informacion.