Presidentja e Komisionit Evropian, Ursula von der Leyen, së bashku me kryeministrin e Kosovës, Albin Kurti, dhe kryetarin e Komunës së Prishtinës, Përparim Rama, vizituan objektin e ri të Fakultetit të Matematikës dhe Shkencave Natyrore (FShMN) në kuadër të Universitetit të Prishtinës. Kjo vizitë zyrtare shënoi inaugurimin e ndërtesës së re, e cila është pajisur me ambiente bashkëkohore, laboratorë dhe hapësira për hulumtime shkencore, nga e cila pritet të përfitojnë rreth 2 mijë e 300 studentë.
Investimi për këtë projekt është realizuar si një bashkëpunim ndërmjet Republikës së Kosovës dhe Bashkimit Evropian, në kuadër të marrëveshjes financiare IPA 2020. Vlera e përgjithshme e investimit arrin në 17.98 milionë euro, me këtë ndarje të financimit:
• 11.9 milionë euro nga Bashkimi Evropian
• 5.08 milionë euro nga Universiteti i Prishtinës
• 1 milion euro nga Ministria e Arsimit
Godina e re, e cila ka një sipërfaqe prej rreth 14 mijë metrash katrorë, synon të përmirësojë dukshëm kushtet e studimit për stafin akademik dhe studentët. Gjatë ceremonisë, von der Leyen zhvilloi biseda me studentët në lidhje me mundësitë e shkëmbimit akademik, kërkimin shkencor dhe inovacionin. Përveç zbulimit të pllakës inauguruese, vizita u vlerësua si një hap thelbësor në forcimin e bashkëpunimit ndërmjet Kosovës dhe institucioneve evropiane në fushën e arsimit të lartë.
Përditësime
Zyra e Kryeministrit konfirmoi se nga objekti i ri i FShMN-së do të përfitojnë rreth 2 mijë e 300 studentë.