Lufta në Ukrainë ka rikthyer çështjen e zgjerimit në agjendën e Bashkimit Evropian. Ndërkohë që Brukseli po jep sinjale se Mali i Zi mund të bëhet anëtari i ardhshëm, brenda bllokut mbeten përçarje të thella mbi mënyrën e vazhdimit të procesit.
Komisionerja e Zgjerimit Marta Koss deklaroi se zgjerimi mbetet një përparësi për Bashkimin Evropian. Ajo theksoi se nëse vendet kandidate përmbushin kërkesat, atëherë edhe BE-ja duhet të mbajë premtimet e saj.
Si provë konkrete e përparimit, Koss njoftoi se për herë të parë në 17 vjet BE-ja ka krijuar një grup pune për të hartuar traktatin e pranimit me Malin e Zi. Studiuesi Strahinja Subotiq nga Qendra për Politika Evropiane në Beograd e quajti këtë hap një sinjal të qartë se Brukseli e sheh Malin e Zi si anëtar të ardhshëm.
Megjithatë, debati mbi zgjerimin lidhet ngushtë me nevojën për reforma të brendshme të Bashkimit Evropian. Studiuesi Steven Blokmans nga Qendra për Studime të Politikave Evropiane në Bruksel shpjegoi se disa shtete anëtare, sidomos Franca, kërkojnë ndryshime në sistemet e qeverisjes dhe vendimmarrjes para se të pranojnë anëtarë të rinj.
Në të njëjtën kohë, vendet e krahut lindor të BE-së mbështesin fuqishëm vazhdimin e zgjerimit, duke e parë atë si domosdoshmëri gjeopolitike.