Kolegji i Gjykatës Supreme të Kosovës, në çështjen e konfliktit administrativ të iniciuar nga organizata “Marakli t’Kerreve” dhe Instituti “TriPika – Sport, Sociale, Ekonomi” kundër Ministrisë së Punëve të Brendshme, ka shpallur të paligjshëm dhe ka shfuqizuar disa dispozita të Udhëzimit Administrativ (MPB) Nr. 12/2024.
Pas shqyrtimit publik të mbajtur më 4 qershor 2026, Gjykata aprovoi pjesërisht kërkesëpadinë e paditësve, duke shfuqizuar paragrafët 1, 3 dhe 4 të nenit 7. Në të njëjtën kohë, Gjykata refuzoi kërkesëpadinë për sa i përket paragrafit 2 të këtij neni, duke e lënë atë në fuqi.
Sipas aktgjykimit, Ligji Nr. 08/L-186 për Rregullat e Trafikut Rrugor dhe Ligji Nr. 05/L-132 për Automjete nuk përmbajnë ndalim të përgjithshëm për vendosjen e materialeve errësuese. Përkundrazi, legjislacioni parashikon mundësinë e modifikimeve, me kusht që ato t’i nënshtrohen procedurave të verifikimit teknik dhe atestimit sipas standardeve ligjore.
Në arsyetimin e saj, Gjykata vlerësoi se paragrafi 1 krijonte kufizime të paqena në ligj duke favorizuar vetëm automjetet me instalim nga prodhuesi, ndërsa paragrafi 3 vendoste një ndalim të përgjithshëm për foliet errësuese. Gjithashtu, u shfuqizua paragrafi 4, i cili parashikonte përjashtime përmes vendimeve të Ministrit të Punëve të Brendshme, pasi u konsiderua si i lidhur ngushtë me kufizimet e tjera të shfuqizuara.