Me qëllim rritjen e transparencës dhe saktësisë së të dhënave, projektligji i ri "Për regjistrin e pronarëve përfitues" vendos kritere më strikte për kompanitë. Ndryshimi kryesor është shkurtimi i afatit të raportimit, ku subjektet do të kenë 28 ditë kalendarike për të njoftuar ndryshimet, krahasuar me afatin aktual prej 90 ditësh.
Projektligji zgjeron përkufizimin e pronarit përfitues, duke e cilësuar atë si individin që kontrollon subjektin përmes aksioneve, kuotave, të drejtave të votës ose mjeteve të tjera. Për strukturat komplekse të pronësisë, drafti kërkon ndjekjen e zinxhirit deri te individi fundor. Për llogaritjen e pronësisë indirekte, kompanitë do të duhet të shumëzojnë pjesëmarrjet në secilën hallkë të zinxhirit dhe të mbledhin rezultatet për të përcaktuar interesin përfundimtar.
Një aspekt tjetër i rëndësishëm është dokumentimi i "marrëveshjeve formale të emërimit", ku një individ udhëzon një tjetër të veprojë në emër të tij si drejtor, aksionar ose themelues. Bizneset janë të detyruara të mbajnë dokumente të përditësuara që provojnë mënyrën e identifikimit të pronarit real dhe mekanizmat e ushtrimit të kontrollit. Kur pronari përfitues nuk mund të identifikohet me mjete të drejtpërdrejta, subjektet raportuese kanë detyrimin të dokumentojnë hap pas hapi të gjitha veprimet e ndërmarra për këtë qëllim.