Një studim i ri, i paraqitur në Sesionin Shkencor Vjetor të Kolegjit Amerikan të Kardiologjisë (ACC.26), ka gjetur se konsumimi i sasive të mëdha ushqimesh ultra-të përpunuara rrit ndjeshëm rrezikun për probleme të zemrës dhe goditje në tru.
Personat që konsumonin më shumë se 9 porcione në ditë kishin 67% më shumë gjasa të pësonin ngjarje të mëdha kardiake, krahasuar me ata që hanin rreth një porcion në ditë. Rreziku rritej gradualisht me çdo porcion shtesë, ku çdo porcion ditor lidhej me një rritje prej mbi 5% të gjasës për infarkt, goditje në tru, vdekje nga sëmundjet koronare të zemrës ose nga goditja në tru.
Ushqimet ultra-të përpunuara përfshijnë produkte të zakonshme të paketuara si:
- patatinat;
- krakerët;
- ushqimet e ngrira;
- mishrat e përpunuar;
- pije me sheqer;
- drithërat e mëngjesit;
- buka.
Lidhja ishte më e fortë tek amerikanët me ngjyrë krahasuar me grupet e tjera racore.
Amier Haidar, mjek dhe studiues i kardiologjisë në Qendrën e Shkencave Shëndetësore të Universitetit të Teksasit në Houston, autor kryesor i studimit, deklaroi: «Ushqimet ultra-të përpunuara lidhen me një rrezik të shtuar për sëmundje të zemrës, dhe megjithëse shumë prej këtyre produkteve mund të duken si zgjedhje të përshtatshme për një vakt apo snack të shpejtë, gjetjet tona sugjerojnë që ato duhen konsumuar me masë».
Detajet e studimit
Ky hulumtim është ndër të parët në shkallë të gjerë në SHBA që shqyrton lidhjen midis konsumit të këtyre ushqimeve dhe sëmundjeve të zemrës te një grup i larmishëm të rriturish. Analiza përfshiu 6.814 pjesëmarrës të moshës 45-84 vjeç, pa histori sëmundjesh të zemrës, nga studimi Multi-Ethnic Study of Atherosclerosis (MESA). Rezultatet përputhen me studime të mëparshme kryesisht evropiane dhe ofrojnë të dhëna shtesë për popullsi më të gjera.