Autoriteti Kombëtar i Ushqimit (AKU) zhvilloi një tryezë teknike me prodhuesit e bukës, brumërave dhe importuesit e miellit në Shtëpinë e Biznesit në Tiranë. Ngjarja u organizua në bashkëpunim me Këshillin Ekonomik Kombëtar (KEK) dhe me praninë e përfaqësuesve të Ministrisë së Bujqësisë dhe Zhvillimit Rural (MBZHR). Qëllimi ishte garantimi i sigurisë dhe cilësisë ushqimore në vend.
Takimi u përqendrua në format e reja të inspektimit, proceset e certifikimit dhe sfidat e integrimit në tregun e përbashkët evropian. Pjesëmarrësit diskutuan për harmonizimin e praktikave të punës me standardet e Bashkimit Evropian.
Gjatë bisedave mbi zbatimin e ligjshmërisë, drejtoresha e përgjithshme e AKU-së, Blerina Gjylameti, theksoi rolin e institucionit si filtër garancie përmes forcimit të kapaciteteve në Pikat e Inspektimit Kufitar. Ajo e cilësoi bashkëpunimin e ngushtë me biznesin si rrugën e vetme për të siguruar produkte gjithnjë e më të sigurta për konsumatorin shqiptar.
Tryeza synon të mbajë të hapur dialogun mes institucioneve shtetërore dhe sektorit privat, me fokus përmirësimin e vazhdueshëm të sigurisë ushqimore.