Operatorët e transportit ndërkombëtar të mallrave me kamionë në Shqipëri kanë ngritur alarmin për përkeqësimin e situatës në sektorin e tyre për shkak të rritjes së çmimit të naftës. Ata paralajmërojnë protesta, duke përfshirë bllokimin e lëvizjes në Portin e Durrësit dhe në pikat kufitare. Ngjarja lidhet me krizën e karburantit si pasojë e konfliktit në Lindjen e Mesme.
Çmimi i naftës në Shqipëri qëndron në 209 lekë për litër, ose 2.09 euro, ndërsa në vendet fqinje është më i ulët: 1.5 euro në Maqedoninë e Veriut (98 denarë), 1.8 euro në Kosovë dhe 1.7 euro në Serbi. Kamionistët nuk mund të furnizohen me karburant në këto vende për shkak të mungesës së rimbursimit të TVSH-së dhe kufizimeve në sasinë e karburantit në rezervuar, përndryshe duhet të paguajnë taksa shtesë.
"Rritja e çmimit të naftës na ka shtrenjtuar në mënyrë të drejtpërdrejtë kostot tona. Përshkojmë rrugë të gjata dhe duhet të furnizohemi në Shqipëri me karburant ku çmimi është shumë herë më i lartë se në rajon. Përveç kostove, në lojë hyn edhe konkurrueshmëria, teksa kamionët e shteteve të tjera operojnë normalisht", deklaroi një operator i transportit ndërkombëtar.
Sipas tyre, situata mund të çojë në falimentim të kompanive. Operatorët kërkojnë subvencionim të kostove të shtuara ose rishikim të kontratave bilaterale me vendet fqinje për të vendosur kufizime në operacionet e kamionëve, pasi marrëveshjet aktuale lejojnë lëvizje pa leje të veçanta. Një përkeqësim mund të ketë pasoja negative jo vetëm për sektorin, por edhe për ekonominë dhe zinxhirin e furnizimit në vend.
Edhe kamionistët e vendeve të tjera në rajon kanë paralajmëruar protesta në pikat kufitare për çmimet aktuale të naftës.